Zubaanee jang lad-lad kar hameN phuslaa rahe netaa....
Samajhataa ye naheeN koi ki hamko khaa rahe netaa.....
Masaail par to charchaa aajkal hotee naheeN koi....
Faqat ik doosre ke eb hee ginwaa rahe netaa.....
Kabhee is dal meN jaate haiN Kabhee us dal meN jaate haiN....
Ilakshan meN tikit miltaa naheeN pachhtaa rahe netaa.....
Safaachat jhooth kahte haiN magar ham aql ke andhe.....
Dikhaa kar khaab din meN hamko yooN bahkaa rahe netaa.....
Khudaa kee yaad aatee hai inheN in hee dinoN shaayad....
Mazaar-o-mandir-o-masjid meN ab to jaa rahe netaa.....
Vilaayat se mile yaa ho kisee zardaar se haasil....
Ghalat ho yaa sahee logoN meN zar barsaa rahe netaa.....
Saleeqaa-e-ghazal to bhool baithaa aajkal saini.....
Sunaa hai ab siyaasat meN use bhee laa rahe netaa......
Comments